apni mahfil mein agar mujh ko nahin paoge
aise haalat mein tum aur bhi ghabraoge

shauq se jaur-o-sitam mujh pe karo tum lekin
apni nadani pe khud aap hi pachhtaoge

naz-o-andaz ki qimat hai tere mere sabab
kis ki mahfil mein bhala aur ghazab dhaoge

koi hoga nahin is jins-e-wafa ka talib
kaun hai mere siwa jis ko ye dikhlaoge

kat lo meri zaban kaise wafadar kahun
hath mein baale kade panw mein pahnaoge

sakht din apne is ummid pe guzre 'khushtar'
aaoge aaoge ab aaoge ab aaoge