ashk aankhon mein meri jaan liye baithi hun
lab pe tere liye muskan liye baithi hun

tum bhi meri tarah kuchh thos irada kar lo
main nibha dene ke paiman liye baithi hun

jald aa jao khizan aane se pahle pahle
main bahaaron ke kuchh ehsan liye baithi hun

ek muddat se teri rah mein bichhi hain aankhen
main shab-e-wasl ke arman liye baithi hun

mujh ko dar hai na kahin zabt ki gir jae fasil
aankhon mein ashk ka tufan liye baithi hun

wo mere pyar ki khushbu se nahin hai waqif
apne daman mein gulistan liye baithi hun