ashk baqi koi ab dida-e-giryan mein nahin
phir bhi to koi kami sozish-e-pinhan mein nahin

aarzu mujh ko kisi shahid-e-gul ki kya khub
meri qismat ke to kante bhi gulistan mein nahin

fasl-e-gul aai to kya haif pae nazr-e-bahaar
ab to ek tar bhi baqi mere daman mein nahin

zauq-e-nazzara pe hai azmat-e-jalwa mauquf
dilkashi warna koi jalwa-e-jaanan mein nahin

sahab-e-ilm-o-fan-o-fikr-o-nazar hai 'athar'
rabt-e-baham magar is daur ke insan mein nahin