aur ab to mere chehre se ubhar aata hai wo
aaina main dekhta hun aur nazar aata hai wo

haal-e-dil kahne ko barish ki zarurat hai mujhe
aur mere ghar hawa ke dosh par aata hai wo

raat ko dil se koi aawaz aati hai mujhe
jism ki diwar se kaise guzar aata hai wo

waqt kho jata hai meri anjuman mein is liye
apne bazu par ghadi ko bandh kar aata hai wo

aakhiri zine talak koi khabar hoti nahin
dil ke tah-khane mein chupke se utar aata hai wo

main hawa ki guftugu likhta hun barg-e-sham par
jo kisi ko bhi nahin aata hunar aata hai wo

sar-buridon ko tunak kar raat suraj ne kaha
aur jab shanon pe rakh kar apna sar aata hai wo

wo nikalta hi nahin 'mansur' teri zat se
zikr aae to sahi aankhon mein dar aata hai wo