aur abhi tez daudna hai mujhe
zindagi dur ki sada hai mujhe

hun musalsal safar mein misl-e-hawa
khud-sari meri rahnuma hai mujhe

jaane us ki judai kya hogi
jis ka milna hi hadsa hai mujhe

wo bhi yaad aaega khuda ke sath
wo bhi mamnun kar gaya hai mujhe

ho chuka khatm daur khwabon ka
ab haqaeq ka samna hai mujhe

wo ki jabir hai khwahishen masum
zist maidan-e-karbala hai mujhe

khatm hai dil pe dastan-goi
kuchh musalsal suna raha hai mujhe