aur kya roz-e-jaza dega mujhe
zinda rahne ki saza dega mujhe

zakhm hi zakhm hun main dagh hi dagh
kaun phulon ki qaba dega mujhe

main samajhta hun zamane ka mizaj
wo banaega mita dega mujhe

be-karan sadiyon ka sannata hun main
kaun sa lamha sada dega mujhe

tut kar lauh-o-qalam ki jagir
koi dega bhi to kya dega mujhe

mere hi khun mein nahla ke 'sharar'
wo salibon pe saja dega mujhe