azal se naz-parwar hun khiram-e-naz-parwar ka
meri hasti bhara karti hai dam aashob-e-mahshar ka

kiya hai aaj wada kis ne aane ka khuda jaane
nazar aata hai chashm-e-shauq darwaza mere ghar ka

liye phirta hai sath apne ghubar-e-khak ki surat
mere sine mein har josh-e-nafas jhonka hai sarsar ka

sahar ke sath hoga chaak mera daman-e-hasti
ba-rang-e-shama bazm-e-dahr mein mehman hun shab bhar ka

banai ek hi donon ki surat kahish-e-gham ne
guman hota hai tar-e-pairahan par jism-e-laghar ka

diya mayyat ko meri ghusl aab-e-girya ne mere
hua ehsan bhi mujh par to apne dida-e-tar ka

khayal-e-ahl-e-duniya aa sake 'taufiq' kya dil mein
nahin ye aaina muhtaj taswir-e-sikandar ka