ba-faiz-e-gardish-e-ayyam hum ko
kisi surat nahin aaram hum ko

sukun dushman junun-parwar iradao
na kar dena kahin badnam hum ko

fasurda khalwaton mein yaad aa kar
rulate hain wo subh-o-sham hum ko

utha ai mutriba saz-e-mohabbat
pila ai saqi-e-gulfam hum ko

na hum ko zindagi ki hai zarurat
na duniya se hai koi kaam hum ko

kisi ki bewafai ke fasane
sunata hai dil-e-nakaam hum ko

kisi ne apni mast aankhon se 'nayyar'
diya hai pyar ka paigham hum ko