baam-o-dar tut gae bah gaya pani kitna
aur barbaad karegi ye jawani kitna

rang kumhla diya baalon mein piro di chandi
tul khinchegi abhi aur kahani kitna

ye talatum ye ana aabla-pai ye junun
hum bhi dekhenge ki hai josh-e-jawani kitna

darmiyan aa gaya ibham ka ek koh garan
dhundte rah gae hum dasht-e-maani kitna

barf ki tarah jame jate hain sare alfaz
kaam aaegi yahan sehr-bayani kitna

dub kar sanson mein rag rag mein sama kar dekho
masala dil ka sulajhta hai zabani kitna

badhta jaega ye sailab-e-hawadis 'shahid'
rok paega koi zor-e-rawani kitna