bahut ukta gaya hun apne ji se
mera dil bhar gaya hai har kisi se

ba-zoam-e-khud ajal se main lada hun
ba-zoam-e-khud main haara zindagi se

na jaane kis gali mein kho gaya hun
main kat kar aap apni zindagi se

mera mazi meri yaaden kahan hain
ye puchhun ab to kya puchhun kisi se

na jaane kitne unwan rashk karte
jo apni dastan kahte kisi se

jo aae jis ke ji mein 'dard' kah le
sununga har kisi ki main khushi se