bajae shabnam-e-taza gulon pe khak na ho
bahaar aae magar koi sina chaak na ho

hazar gham se guzarne ke baad bhi ai dil
fasana apni mohabbat ka dardnak na ho

bharam khule na mohabbat ka ai dil-e-wahshi
junun ho josh mein lekin gareban chaak na ho

fuzul hai ye tasalli tamasha hamdardi
madad ka jazba agar wajah-e-ishtirak na ho

hamari rah mein kante kahan se aaenge
jo dushmanon ke dilon par hamari dhak na ho

hamara khun to shamil ho ghuncha-o-gul mein
faza-e-sahn-e-chaman mein hamari khak na ho

khuda ka shukr ki dil mera saf hai 'manzar'
milun main aur mulaqat mein tapak na ho