bakht jaga hai tere misr ke bazaron ka
silsila badhta hi jata hai kharidaron ka

tere bad-khwahon ka baqi nahin ab koi nishan
nam leta hai bhala kaun jafa-karon ka

bazm-e-ushshaq mein aana to junun hi lana
ki yahan kaam nahin koi bhi hushyaron ka

sang jitne hain tajalli-gah-e-sad-tur hue
kya muqaddar hai tere shahr ki diwaron ka

ghaus-e-azam ka laqab jis ko mila hai 'sabir'
wahi salar hai sab qafila-salaron ka