band darwaze khule ruh mein dakhil hua main
chand sajdon se teri zat mein shamil hua main
khinch lai hai mohabbat tere dar par mujh ko
itni aasani se warna kise hasil hua main
muddaton aankhen wazu karti rahin ashkon se
tab kahin ja ke teri did ke qabil hua main
jab tere panw ki aahat meri jaanib aai
sar se pa tak mujhe us waqt laga dil hua main
jab main aaya tha jahan mein to bahut aalim tha
jitni talim mili utna hi jahil hua main
phul se zakhm ki khushbu se moattar ghazlen
lutf dene lagin aur dard se ghafil hua main
moajaze ishq dikhata hai 'sikandar'-sahib
chot to us ko lagi dekhiye chotil hua main