bar-sar-e-reg-e-rawan phul nahin khil sakte
dasht hai dasht yahan phul nahin khil sakte

barwar hogi dua jab use manzur hua
waqt se pahle yahan phul nahin khil sakte

main ne is dil ka nihan-khana dikhaya us ko
us ne puchha tha kahan phul nahin khil sakte

wo jahan chahe wahan rang bichha de apne
us ki nazron se nihan phul nahin khil sakte

farq padta nahin mausam ke badalne se koi
ab zamin hai na zaman phul nahin khil sakte

tum ko is khak se nisbat hai bahut pahle ki
thik kahte the miyan phul nahin khil sakte

aisi mitti mein bhala kasht hi kya ho 'jawed'
mausam-e-gul mein jahan phul nahin khil sakte