barish nahin lati kabhi aflak se khushbu
khud jhum ke uthti hai isi khak se khushbu

is bagh-e-tilismat ke phulon ka to kya zikr
aati hai wahan ke khas-o-khashak se khushbu

so manzar-e-khun-rang the konpal se kali tak
phuti nahin yunhi gul-e-sad-chaak se khushbu

ehsas ko chhu jae to chhu jae wagarna
rahti hai gurezan had-e-idrak se khushbu

mahsus to hoti hai agar koi kare to
ajdad ki ajdad ki imlak se khushbu