bas najat-e-zindagi to ishq-e-ruhani mein hai
ye saza-e-maut sun kar jism hairani mein hai

ret par phaila hua hai khwab jaisa ek sarab
khushk aankhon ka sukun sahra ke is pani mein hai

iztirabi kaifiyat hi is zamin ka hai nasib
har ghadi gardish mein hai har dam pareshani mein hai

kuchh ghubar aankhon tak aaya raaz hum par tab khula
qafila ab bhi koi is dil ki virani mein hai

phir kisi tufan ki aamad ka andesha hua
phir qayamat si bapa dariya ki tughyani mein hai

yunhi aasani se jine ka irada kar liya
ye na dekha kitni mushkil aisi aasani mein hai

is qadar auraq-e-mazi par chadha gard-o-ghubar
shayad ab in ki jagah bahte hue pani mein hai

apni mitti se 'alina' ruh ki ulfat to dekh
muztarib hai ye bahut gar tu pareshani mein hai