baz auqat mujh ko lagta hai
zindagi bas nazar ka dhoka hai

ped paude gira diye jis ne
us hawa mein charagh rakkha hai

dekh dariya isi ko kahte hain
jo kinaron mein rah ke bahta hai

ek musawwir ko jaanta hun main
dasht mein jo shajar banata hai

us ki tabir ka banega kya
main ne jo khwab khud tarasha hai

raushni ke qarib jitna hun
qad mein utna hi mera saya hai

kuchh nazare zaruri hote hain
warna aankhon mein dard rahta hai

hum ko milne wo aaenge 'ariz'
han magar ye khayal achchha hai