be-barg-o-bar rah mein sukhe darakht the
manzil tah-e-qadam hui hum tez-bakht the

hamle chahaar samt se hum par hue magar
andar se war jitne hue zyaada sakht the

the ped par to mujh ko bahut khushnuma lage
tode to jitne phal the kasile karakht the

soe to yaad qaus-e-quzah mein simat gai
jage to jitne rang the wo lakht lakht the

sar to chhupaen koi kirae ki chhat mile
yun is qadam ki zad mein kabhi taj-o-takht the