be-niyazi ke silsile mein hun
main kahan ab tere nashe mein hun

hijr tera mujhe satata hai
aur baqi to bas maze mein hun

dhundh mat in udas aankhon mein
ghaur kar tere qahqahe mein hun

wo mujhe ab bhi chahta hoga
main abhi tak mughaalate mein hun

har taraf mahfilen khayalon ki
ishq ke shahi mahkame mein hun

tod kar hi nikal le koi
qaid main apne daere mein hun

us ko manzil bhi mil gai apni
aur main hun ki raste mein hun