bewafa tha phir bhi duniya us ki shaidai hui
gham to ye hai bas mere hisse mein tanhai hui

roz-e-mahshar jis ghadi aaya jo nama hath mein
hae kaisi us bhari mahfil mein ruswai hui

mubtala-e-zoam-e-shohrat hasrat-e-nam-o-numud
ho gaya insan kaisa salb binai hui

munkir-e-insan ko duniya samajhti hai haqir
aajizi ki is jahan mein kab pazirai hui

badliyon ki ot mein yun chhup gaya mah-e-tamam
jaise dulhan chehra dhak baithi ho sharmai hui

meri har ek baat ka bas ek matlab hai 'ana'
jis ke matlab chaar hon aisi na goyai hui