bhare zakhm phir taza dam dekhte hain ajab doston ke karam dekhte hain koi lashkar-e-fatehin ja raha hai fazaon mein unche alam dekhte hain khayal-e-sanam bhi jamal-e-sanam hai ab is taur ru-e-sanam dekhte hain bani qatl gahen ye galiyan ye kuche ajab maut ka raqs hum dekhte hain kahin pal rahe hain amiron ke kutte kahin muflisi ke sitam dekhte hain utar kar falak se sitare bhi 'shafi' teri zulf ka pech-o-kham dekhte hain