bhed kuchh khulta nahin diwar-o-dar mein kaun hai
ghar se be-ghar ho gaya hun mere ghar mein kaun hai

sab ke sab pagal nazar aate hain mujh ko shahr mein
mere jaisa aur pagal shahr-bhar mein kaun hai

haq-ba-jaanib kaun hai ab aap hi batlaiye
main nahin batlaunga meri nazar mein kaun hai

dil ke malbe mein pada hai aur chillata nahin
dubta hai aur chup hai chashm-e-tar mein kaun hai

kaun apna ghar uthae phir raha hai dar-ba-dar
ghar mein baitha hai magar har-dam safar mein kaun hai

sochta rahta hun 'alwi' par samajh pata nahin
main nahin to is bala ke shor-o-shar mein kaun hai