bhula hua ulfat ka sabaq yaad karen hum
is ujde chaman ko chalo aabaad karen hum

ye khun mein dube hue barbaadi ke qisse
tarikh se ab khatm ye rudad karen hum

mazi ke fasane hain mazahib ke ye jhagde
in baaton mein kyon waqt ko barbaad karen hum

logon ki taraqqi ka naya rasta dhunden
barbaadi ka saman kyon ijad karen hum

ai mere khuda tu hi bacha arz-e-watan ko
ab ja ke kahan shikwa-e-bedad karen hum