bikhar na ja kahin khud ko meri panah mein rakh
hain tund-o-tez jo dariya meri nigah mein rakh

jhuke na sar ye kisi aastan pe tere siwa
to wo ghurur-o-ana apne kaj-kulah mein rakh

ye kab kaha ki mohabbat se baz rah lekin
palat ke aa bhi sake rasta nigah mein rakh

fareb-e-nafs se mahfuz to ho zat meri
kahin to khauf koi lazzat-e-gunah mein rakh

rahega baz kahan dil bhala mohabbat se
par ek harf-e-tasalli to intibah mein rakh

muqabla to alag baat hai hawaon se
jala ke ek diya koi pahle rah mein rakh

asir hun na kahin dam-e-hirs-o-duniya ka
hamara shauq-e-talab apni bargah mein rakh

chhupe hain karb hazaron is ek tabassum mein
gulon ki chah jo kar khar bhi nigah mein rakh

abhi khabar hi kahan tujh ko soz-e-dil kya hai
to qahqahon ko abhi ruh ki karah mein rakh

yahi ujale kabhi chhin lenge binai
zara sa shauq andheron ka bhi nigah mein rakh