bina sahar ke ujale mujhe qubul nahin
tere ye jhute dilase mujhe qubul nahin

na tu madari hai na main tera jamura hun
ye aae din ke tamashe mujhe qubul nahin

badha ke hath ko tum ne mujhe giraya hai
agar yahi hain sahaare mujhe qubul nahin

kisi ke zehn ki jo khidkiyan na khol saken
to aise ilm ke dawe mujhe qubul nahin

jo mere dil pe hai guzri wahi agar na kaho
to baqi shor-sharabe mujhe qubul nahin

ho zulm aam jahan par jahan na haq pahunche
ye bhule-bhatke zamane mujhe qubul nahin