burida-dast-o-qalam ki baraat le ke chalo
harim-e-jabr mein sham-e-hayat le ke chalo

fareb-e-shab hi sahi aaj qasr-e-zulmat mein
sahar ki baat chali hai ye baat le ke chalo

sitam-kasho khalish-e-zakhm-e-e'tibar ke sath
jarahat-e-nigah-e-iltifat le ke chalo

ye rasm-e-sang-zani ajnabi si baat nahin
jabin-e-shauq pe naqsh-e-sabaat le ke chalo

'shamim' jins-e-wafa zindagi ke mele se
kharidna hai to naqd-e-hayat le ke chalo