chahte ho agar samar achchha
sikh lo phir koi hunar achchha

gar mudawa-e-jabr kar na sako
dhund lo ek nauhagar achchha

khushnuma mustaar mahlon se
apna bosida sa hi ghar achchha

sau fareb ek kulah-e-shahi mein
is se ai dil barahna-sar achchha

rahen katti hain kitni surat se
sath ho ham-safar agar achchha

zulm dekha kiye rahe khamosh
aankh walon se be-basar achchha

wajh-e-tashwish aagahi ho agar
ba-khabar se hai be-khabar achchha