chaunka hai aaj yun tera diwana khwab mein
jaise ki mil gaya koi virana khwab mein

likhna hai pichhle din ka bhi afsana khwab mein
ai hone wali subh na aa jaana khwab mein

din-bhar ki mushkilat ki duni saza mili
bedariyon ka khwab hai dohrana khwab mein

hum ko gham-e-jahan ne dilase bahut diye
bahlana jagte mein to samjhana khwab mein

subh-e-subu-ba-dast se ab ke milenge hum
dar-o-rasan pe aae hain rindana khwab mein

shayad ki aaj gardan-e-saqi mein hath hon
chhina hai ek shakhs se paimana khwab mein