chhupta nahin naqab mein jalwa shabab ka
nikle hai chhan ke taron se nur aaftab ka

kuchh dil se apne puchh ke wa'iz hamein bata
yun bar-bar de na hawala kitab ka

kausar ke sath-sath hai tasnim bhi wahin
naqsha to khub khincha hai wa'iz sarab ka

kab tak marenge aas mein insaf ki bashar
kyon muntazir hai maula tu roz-e-hisab ka

aaghaz-e-kaenat ki thi jis mein dastan
lagta hai phat gaya hai wo panna kitab ka

kuchh apna ird-gird badal kar dikha 'sada'
nahaq padha na sab ko sabaq inqalab ka