chup rahe to shahr ki hangama aarai mili
ab agar khole to hum ko qaid-e-tanhai mili

zindagi ki zulmaten apne lahu mein rach gain
tab kahin ja kar hamein aankhon ki binai mili

mausam-e-gul ki nai taqsim hairan kar gai
zakhm phulon ko mile kanton ko ranai mili

sath-e-dariya par ubharne ki tamanna hi nahin
arsh par pahunche hue hain jab se gahrai mili

dusron ko sang-e-dil kahna bada aasan tha
khud ko jab dekha to apni aankh pathrai mili