dagha fareb sitam qatl-e-‘am kya-kya hai
amir-e-shahr bata tera kaam kya-kya hai

adab tamiz mohabbat khulus ki baaten
tumhaari bazm mein aakhir haram kya-kya hai

ye chakla-ghar bhi ye maikhane bhi khususi hain
tumhaare shahr mein bazar-e-'am kya-kya hai

gharibi faqa-kashi dard aur majburi
zindagi ye to bata tera nam kya-kya hai

nasib sab ka batate ho kuchh batao mujhe
mere nasib mein is subh-o-sham kya-kya hai