dahan ka lab ka zaqan ka jabin ka bosa do
hamein to lene se matlab kahin ka bosa do

bahut dinon mein tumhein bas mein daw se laya
jahan jahan ka main mangun wahin ka bosa do

na tursh-ru ho na khatte karo hamare dant
maza hai hans ke lab-e-shakkarin ka bosa do

hazar kijiye inkar main na manunga
main sunne wala nahin hun nahin ka bosa do

meri tumhaari yahi shart thi jo ki inkar
to chaar jit ke ek us nahin ka bosa do

wo bole 'nutq' teri garmiyon mein aag lage
kabhi kaha jo rukh-e-atishin ka bosa do