dariya pe barishon ka asar kuchh nahin hua
mujh par bhi sazishon ka asar kuchh nahin hua

duniya ne koshishen to bahut kin magar janab
un par sifarishon ka asar kuchh nahin hua

dil chir kar bhi main ne dikhaya use magar
zalim pe khwahishon ka asar kuchh nahin hua

wo mere har sawal pe patthar bana raha
nadan pe pursishon ka asar kuchh nahin hua

'santosh' main ne dhundha use har dayar mein
par meri kawishon ka asar kuchh nahin hua