daur-e-gardun mein kisi ne meri gham-khwari na ki
dushmanon ne dushmani ki yar ne yari na ki

hashr ka sauda hua zauq-e-jamal-e-dost mein
hum ne bazar-e-jahan mein kuchh kharidari na ki

qahqahon ki mashq se main ne nikala apna kaam
jab kisi ne qadr-e-ah-o-nala-o-zari na ki

ku-e-jaanan ka pata de kar main pahuncha khuld mein
mujh se kuchh rizwan ne bahs-e-naji-o-nari na ki

waqt sae ka abhi aaya nahin maghrib hai dur
kyon pasand us barq-wash ne mashriqi sari na ki

jama-zebon ki nazar bhi dalq-e-'akbar' par padi
shan hi kuchh aur thi us khirqa-e-parina ki