dhire dhire aap ka gulshan mein aana yaad hai
chori chori mujh se wo aankhen churana yaad hai

chalte chalte rah mein aur baaton baaton mein kabhi
wo tera nazren mila kar muskurana yaad hai

mit nahin sakti kabhi dil se ada-e-dil-nawaz
naz se manind-e-ahu aana jaana yaad hai

hae wo masti ka aalam wo nirali shokhiyan
husn ki jadugari ka wo zamana yaad hai

jin ghalat-andaz nazron se kabhi dekha mujhe
dil hua tir-e-nazar ka bas nishana yaad hai

kale baadal ki tarah lahra gai zulf-e-siyah
aur wo sawan ghata ka kanp jaana yaad hai

wo jo guzra tha kabhi is anjuman mein ai 'asad'
zindagi ka besh-qimat wo zamana yaad hai