dhup thi sahra tha lekin jism ka saya na tha
aadmi is se ziyaada to kabhi tanha na tha

khinchte the apni jaanib regzaron ke sarab
dur tak sahra mein lekin aab ka qatra na tha

ek mubham khwab tha aankhon mein aur dil mein junun
zehn mein lekin imarat ka koi naqsha na tha

bhid thi basti mein lekin main kise pahchanta
itne logon mein kisi bhi shakhs ka chehra na tha

is qadar shiddat se wo dariya samundar se mila
ab samundar hi samundar tha kahin dariya na tha

ghar ki azmat hae jis diwar se mahfuz thi
ghar ke darwaze pe ab wo tat ka parda na tha

wo ghazal apni sajata tha lahu ke rang se
phir bhi kahte hain 'nafas' us ka koi pesha na tha