dil bahak jata hai barsat ke sath
hum bigad jate hain haalat ke sath

wo muqaddas hai sahife ki tarah
hifz ho jata hai aayat ke sath

kitne raushan hain dar-o-baam-e-khayal
hum chamakne lage zarraat ke sath

dasht-e-jaan aur tere dard ki lau
kaun guzra hai meri raat ke sath

ye ghanimat hai ki hum zinda hain
log mar jate hain aadat ke sath

koi tadbir falak ki na chali
hum jawan ho gae aafat ke sath

maslahat sach nahin kahne deti
log bikte hain karamat ke sath

ek raghbat hai mai-e-nab se 'qais'
ek talluq hai kharabaat ke sath