dil-e-betab ka payam liya
phir kisi ne mera salam liya

ruth kar hum se tu ne ai zalim
kis khata ka hai intiqam liya

ho ke majbur josh-e-ulfat se
hum ne daman kisi ka tham liya

phul jhadne lage zaban se meri
jab kisi gul-badan ka nam liya

kaam aae na aql-o-hosh jahan
hum ne diwangi se kaam liya

dagmagate hue mere dil ko
us hasin ajnabi ne tham liya

shiddat-e-ranj-o-gham mein ai 'nayyar'
hum ne jam-o-subu se kaam liya