dil-e-parkhun mein neza tutta hai
sar-e-ehsas kya kya tutta hai

hawa sar pitti hai shakh-e-jaan se
kahin jo dur ghuncha tutta hai

par-e-taus raqs-e-rang-o-nikhat
kahin pairon se tara tutta hai

kahin ghunghru kahin shisha kahin dil
kahin ahd-e-wafa sa tutta hai

kahin barfab ho jati hain dhupen
kahin saya sarapa tutta hai

masham-e-jaan munawwar barg-e-gul sa
sar-e-marqad hayula tutta hai

main dab jata hun be-awaz 'zahid'
jahan mabad ka malba tutta hai