dil hamein chaak-gareban nahin hone deta aur junun tangi-e-daman nahin hone deta ek saya hai jo mujh mein kahin poshida hai ek suraj hai ki taban nahin hone deta ek jala hai jo danai ne bun rakha hai main jo chahun bhi to nadan nahin hone deta tham leta hai koi daman-e-imkan-e-sarab kyon hamein sarf-e-nigaran nahin hone deta mar hi jaenge pasheman jo hue ishq mein hum bas yahi khauf pasheman nahin hone deta bas wahi khwab ki jo dair ki hasrat mein mita aankh ko khana-e-viran nahin hone deta koi is anjuman-arai se nalan hai ki jo bas yahan jashn-e-bahaaran nahin hone deta