dil ki dhadkan ko aas kis ki hai
zindagani mein pyas kis ki hai

main kisi ka na koi mera hai
phir ye nas nas mein pyas kis ki hai

jis ko main ne kabhi nahin dekha
mere andar ye sans kis ki hai

kashmakash dil mein hai ye barson se
aas kis ki hai yas kis ki hai

har badan mein chhupa jo jauhar hai
us mein bu aur bas kis ki hai

khair mein shar ki ye 'rawish' kaisi
dil se uthti bhadas kis ki hai