dil mohabbat siwa kuchh nahin chahta
us ki khatir ye kya kuchh nahin chahta

yun hi dariya samundar mein milta rahe
aab bahta hua kuchh nahin chahta

raat bhar jo jala raushni ke liye
subh se wo diya kuchh nahin chahta

bas dilon ki kashish se bhara ho safar
ishq ka qafila kuchh nahin chahta

jo mile ehtiram-e-mohabbat ko tum
sab mujhe mil gaya kuchh nahin chahta

tum se 'betab' ek chahta hai nazar
aur kya hai dua kuchh nahin chahta