dil-ruba bhi wo dil-nawaz bhi hai
aur phir sab se be-niyaz bhi hai

ruh-farsa hai soz-e-ishq magar
mujh se puchho to jaan-nawaz bhi hai

shikwa-e-daur-e-asman hi nahin
apni qismat pe mujh ko naz bhi hai

kya tamasha hai mahfil-e-hasti
ek haqiqat bhi hai majaz bhi hai

jo khuda se bhi kah nahin sakta
mere dil mein nihan wo raaz bhi hai

kaun puchhe ki hazrat-e-'simab'
aap waqif hain koi 'raaz' bhi hai