dil se mere tanhai ki shiddat nahin jati
ab tu bhi chala aae to wahshat nahin jati

is daur ki talim ka mear ajab hai
talim to aati hai jihaalat nahin jati

kya soch ke ummid-e-wafa bandhi thi tum se
ek umr hui dil ki nadamat nahin jati

muflis bhi to khuddar hua karte hain logo
ghurbat mein bhi insan ki sharafat nahin jati

le jati hain ab tak bhi meri nind chura kar
ab tak bhi un aankhon ki shararat nahin jati

de deta hai allah mujhe hasb-e-zarurat
ab le ke kisi dar pe zarurat nahin jati

sau bar teri jaan pe ban aai hai 'farhat'
phir bhi teri haq-goi ki aadat nahin jati