dil se tumhaari yaad bhulane chala hun main
lau aur sham-e-gham ki badhane chala hun main

behtar wo maut hai jo mile zindagi se dur
viraniyon mein khud ko lutane chala hun main

bekar zindagi ye khalish ke baghair thi
hath apna hadson se milane chala hun main

phir dubne chala hun kisi ki nigah mein
phir hosh kho ke hosh mein aane chala hun main

shamen jala ke aarzuon ke mazar par
barbaadiyon ka jashn manane chala hun main

nakaam hasraton ke janaze liye hue
duniya ko apne zakhm dikhane chala hun main

thukra ke aaj sare sahaaron ko ai 'shafiq'
khud apni bigdi aap banane chala hun main