din bahut raat bahut subh bahut sham bahut
aae har-waqt mere hisse mein ilzam bahut

apne kirdar se mayus nahin hota main
kaam aa jata hun rahte hue nakaam bahut

zahr-o-ruswai kabhi hai to kabhi dar-o-salib
pae ushshaq ne sach kahne ke inam bahut

is liye ho gaya mashhur zamane bhar mein
mere rishton ne mujhe kar diya badnam bahut

zulmat-e-gham hi mere ghar ka muqaddar thahri
zakhm ki shama se raushan hain dar-o-baam bahut