diya jala bhi nahin jo use bujha diya jae
hamein bhi waqt se pahle hi ab sula diya jae

yahi raza hai agar katib-e-muqaddar ki
to jo panap na sake phir use mita diya jae

rahe na zad mein kisi bhi badalte mausam ki
nihaal-e-dil pe wahi phul ek khila diya jae

kisi ko pane ka ehsas is tarah se rahe
to bazm-e-dost se dushman ko hi utha diya jae

falak ko chhune ki be-sud aarzu na mile
main khak hun to mujhe khak mein mila diya jae

yahi mutalba 'raziya' hai aaj munsif se
hamare sabr-o-raza ka koi sila diya jae