diya munder pe dil ki jala rahi hun main
hawa-mizaj ko wapas bula rahi hun main

mujhe kisi ke bhi jaane se dukh nahin hota
na jaane kis liye aansu baha rahi hun main

ye teri marzi ki aae na aae wapas tu
nizam-e-dil ko to dil se chala rahi hun main

isi charagh se har samt raushni hogi
jala hai dil to diye sab bujha rahi hun main

jo hath aaj mujhe thamte nahin hain 'shabi'
gae dinon mein to un ki dua rahi hun main