dua hai aur na koi bad-dua hai
ye duniya to mahz ek hadisa hai

tumhaare samne jo aaina hai
yaqin jaano wahi to aashna hai

jo kahna tha wo hum ne kah diya hai
bataen aap ka kya faisla hai

ajab duniya hai insanon ki duniya
jahan insaniyat hi gum-shuda hai

tasawwur barha pahuncha wahin par
zamir aksar jahan par rokta hai

yahi sachchai hai har ek sach ki
yahi lagta hai bas ek zawiya hai

ye duniya jaan-e-jaan teri na meri
makin sab hain magar malik khuda hai