ehsan hai go tera sitam uth nahin sakta
khuddar se ye bar-e-karam uth nahin sakta

khud but ke pujari na samajh pae haqiqat
tum se ye hijab ahl-e-haram uth nahin sakta

ab but hain haram mein na tajalli-e-butan hai
kabe ki taraf mera qadam uth nahin sakta

jis dard pe nazan hain shahidan-e-mohabbat
wo dil mein kabhi tere sanam uth nahin sakta

hun rahat-o-aram se imdad ka talib
ab dil se mere bar-e-alam uth nahin sakta

eazaz ye hasil hai faqat ahl-e-qalam ko
har ek se hathon mein qalam uth nahin sakta